Բարեփոխումներ ՇՏԱՊ ՕԳՆՈՒԹՅՈՒՆ ծառայությունում

Ամանորյա տոնակատարություններից հետո, հավանաբար, շտապբուժօգնության կանչերի մեծ մասն առնչվում են սննդային, ալկահոլային թունավորումներին, այրվածքներին:

Այս առումով, թե ինչպիսին էր այս տարվա հետտոնական կանչերի վիճակագրություն, խնդրեցինք պատմել Երևանի քաղաքապետարանի ՙշտապբուժօգնության՚ ՊՓԲԸ գործադիր տնօրեն, բժշկական գիտությունների թեկնածու Արտյոմ Պետրոսյանին:

2009 թվականը մեզ համար եղավ կայուն տարի, այն առումով, որ ֆինանսական ճգնաժանային պայմաններում կայունությունը արդեն իսկ համարում եմ դրական արդյունք: Այս ընթացքում չեն եղել վառելիքի, դեղորայքի մատակարարման խախտումներ, աշխատավարձի ուշացումներ: Միայն 2009-ին չենք կարողացել իրականացնել զարգացման ծրագրերի ներդրումներ: 2010 թվականն սկսել ենք կայուն մեկնարկային դիրքերից և ակնկալում ենք խոշոր ներդրումային ծրագրերի իրականացմանը: Առողջապահության նախարարության հետ համատեղ կազմվել է ողջ հանրապետության շտապբուժօգնության ծառայության արդիականացման ծրագիրը: Երևանի կտրվածքով, ծրագիրը ներկայացված է մի շարք միջազգային կազմակերպություններին, որոնք պատրաստակամ են ծրագիրը աստիճանաբար իրականացնել: Առաջին անգամ Երևանի քաղաքապետի որոշմամբ 2010 թ. Երևան համայնքի բյուջեից հատկացումներ են կատարվել շտապ բուժօգնության 5 ավտոմեքենա ձեռք բերելու նպատակով: Ընդ որում, ավտոմեքենաները պետք է լինեն որակյալ բոլոր սարքավորումներով հագեցված: Ես դա համարում եմ շատ մեծ իրադարձություն և երևի ավելորդ է նշել, թե շտապբուժօգնության համար որքան մեծ նշանակություն ունի անհրաժեշտ սարքավորումներով ավտոմեքենաներ ունենալը: Դրանով լուծվում է երկու խնդիր: Առաջինը բարձրանում է բնակչության շտապբուժօգնության սպասարկման որակը և երկրորդը, որը նույնպես կարևոր նշանակություն ունի, անձնակազմի համար ստեղծվում են բարելավված աշխատանքային պայմաններ: Դրա համար ձեր թերթի միջոցով ուզում եմ կոլեկտիվի անունից իմ շնորհակալական խոսքը հղել Երևանի քաղաքապետին, որովհետև սա առաջին դեպքն է, որ ընտրվելուց հետո առաջին իսկ որոշումներից մեկը դարձավ շտապբուժօգնության ծառայությունն հագեցնել ավտոմեքեներով: 

Հուսով ենք 2010-ին համագործակցություն միջազգային կազմակերպությունների հետ կտա իր դրական արդյունքը: ԱՄՆ-ի դեսպանատան հետ պայմանավորվածության համաձայն, մեզ կտրամադրվի սարքավորումներ և նավիգացիոն համակարգ, որը տեղադրվելու է «1-03»դիսպետչերական ծառայությունում, իսկ շտապօգնության մեքենաների մեջ տեղադրվելու են GPS համակարգը, որը հնարավորություն կընձեռի էկրանի վրա տեսնելու շտապօգնության մեքենաների տեղակայումը և տեղաշարժը: Այն օպերատիվ տեսանկյունից շատ մեծ նշանակություն ունի, քանի որ նվազում է հիվանդին հասնելու ժամանակահատվածը: ԱՄՆ միջազգային զարգացման գործակալության հայաստանյան գրասենյակի ներկայացուցչությունը պատրաստակամություն է հայտնել ներդրումներ կատարել ոչ միայն Երևանի, այլև հանրապետության շտապբուժօգնության համակարգում:

Մեզ մոտ բժշկական բրիգադները համապատասխանեցված են կանչերի թվին: Այսօր մեր ծառայությունում գործում է 33 բրիգադ: Ներկայումս, իմ որոշմամբ, վարում ենք ճկուն քաղաքայանություն, ըստ որի, սեզոնային կանչերի թվի ավելացմամբ ավելացնում ենք նաև բրիգադների թիվը, օրինակ, իմ հրամանով հունվարի 1-10-ը, տոնական օրերին, կանչերի թիվն ավանդաբար ավելանում է և մենք  բրիգադների թիվն ավելացրինք 3-ով: Այսօր մեզ մոտ աշխատում են 198 բժիշկ, շուրջ 240 բուժքույր, ինչպես նաև վարորդներ և տեխնիկական անձնակազմը: 

Ի տարբերություն բժիշկների, բուժքուրերի և վարորդ-սանիտարների համար պարտադիր վերապատրաստման համակարգ չի գործում, ուստի, մենք ամեն տարի նրանց համար անցկացնում ենք վերապատրաստման դասընթացներ, այնուհետև` ներքին ատեստավորում: 

Սկսած նոյեմբերի կեսերից կանչերի կտրուկ աճ նկատվեց: Բացի սեզոնային կանչերի աճից, որը միշտ լինում է աշնանը, ավելացավ նաև A/H1N1 գրիպի վիրուսով կասկածյալների կանչերը: Առողջապահության նախարարի հրամանով մենք սկսեցինք հերթապահություններ սահմանել ՙԶվարթնոց՚ օդակայանում, կասկածվող բազմաթիվ հիվանդների տեղափոխեցինք ինֆեկցիոն հիվանդանոց, ինչպես նաև Երևան քաղաքի հիվանդանոցների մի շարք վերակենդանացման բաժանմունքներ: Այնուհետև կրթության նախարարության կողմից հայտարարված դպրոցական արձակուրդների շնորհիվ, արդեն հաջորդ օրն իսկ նվազեց կանչերի թիվը, որը շարունակվեց մինչև տոնական օրերը: 

Մենք այս տարի բավական շատ վառելիք, դեղորայք էին պահեստավորել, քանի որ աշխատելու էինք տոնական բոլոր օրերին, սակայն պետք է նշեմ, որ, ի տարբերություն անցած տարվա նույն ժամանակահատվածի, նկատելի էր կանչերի նվազում: Հունվարի 19-ի դրությամբ, կանչերի թիվը հասավ 453-ի: Ներկայումս նվազել է նաև սեզոնային գրիպի կանչերի թիվը, անցած տարվա նույն ժամանակաշրջանի համեմատ: 

Ըստ իմ դիտարկումների, այս տարի զանգվածային լրատվական միջոցները շատ անդրադարձան սննդակարգի պահպանմանը, տարբեր հեռուստաալիքներով մեր բժիշկների խորհուրդները նպաստեցին նաև թունավորումների նվազեցմանը և, կարծես թե, բնակիչները հետևեցին այդ խորհուրդներին: Ի դեպ, նկատելի է, որ ժողովուրդն սկսել է ավելի շատ մտածել սեփական առողջության պահպանման մասին, որը նաև ռազմավարական խնդիր է մեր երկրի համար և ուրախ եմ, որ մեր ժողովուրդը հասել է այդ մակարդակին: 

Հարցեր, պատասխաններ, մեկնաբանություններ